By. Ela Khiangte
Kan chhenna khua, Adelaide atanga mel 2600 vela hla Chrismas thliarkar tia an koh ah chuan chakai maktaduai 120 velin khawpui an din ve a. Chakaite chuan ram ngawah awmhmun an khuar tlangpui a, an chaw ei ber chu thlai hnah, thing hnah leia tla leh rannungte a ni. Heng chakaite hian mak tak maiin kum tin a rual a rualin khual an zin thin a. An khawsakna ram ngaw atang km 8 vela hla, tuifinriat lamah chuan nau nei turin an zin chhuak thin.
An zin chhung hi ni ngate a rei a; An zin chhuah hun hi a tlangpuiin October thla velah a ni. An tum a ruh na meuh mai, an tumna hmun an thlen hma chuan an hma zawnah eng pawh awm se an hmachhawn hmiah hmiah mai a, an thih chilh ngam a ni. An tam tham em avangin khaw then khatah phei chuan mawtawr kawngpui hial pawh an khar thin a.
Chakaite pawh hian in awp dan leh khawtlang inkaihhruai dan tha tak an nei ni ngei tur a ni; mak ang reng tak chu an zin chhuah apiangin chakai pa rual hian hma an hruai a, tin, a nu ten an zui a. An zin kawngah chuan tlang leh ruam, kham ko sang tak tak te, mihring luahna khua leh mawtawr kawngpui pawh awm se an hmachhawn hmiah hmiah mai a, an tumna hmun an thlen hma chuan an kal ngar ngar mai a ni.
Heng chakaite zin kawng hi thil namai zawng a ni lo tawp mai. Mawtawr leh lir thei ten enge maw zat chu an lo chil hlum mai bakah, an hmelma lian ber taivang sen chi hian an lo lam bun thin a, sang enge maw zat chu an lo seh hlum thin. Beihna an tawk ve nasa thin hle a ni. An tumna hmun an thlen chuan tuipui kamah an intlar thluah mai a, tui a rawn fawn changin nau an lo titla a, tuifawn chuan chakai piang hlimte chu li thuk lamah a hruai ta thin a. An zin chhuah chhan an tih fel hnu chuan lungrual takin an khaw lam, ram ngaw lam pan chuan an haw leh dial dial thin a ni.
0 comments:
Post a Comment
Chhiartute Ngaihdan Huang