14 May 2009

Mizo Thalaite Leh Tunlai Khawvel

by, Laltlanzova Khiangte

Old Trafford leh Anfield lo hre bel ve laklawh tawh tan chuan Lammual-a chhir khuk luih luih leh mahni vênga ball liam ûm luah luah chu a zia lo deuh tlat tawh a. Vai ram cinema hall lianpui puia Hollywood film chhuak thar en paha chânâ lo hmawm ve hmak hmak tawh tan cinema en tur neih ve miah loh chu a khawharthlak lo thei lo. India ram khawpui hrang hranga intihhlimna hmun hrang hrang lo chuan bel ve laklawh tawhte tân tlang chhipa han hawi thawven vûk vûk ringawt pawh a ’satisfaction’ a sang vak tawh lo maithei a ni.

Miin Disney Land an tih laia City Park zimtea chhas-te nena lo vei nulh nulh chu tunlai chhanah a ‘nice’ tawh loin a lang si a, dai panin an han tlan chhuak ve vut vut a, khawtlang duty mit an tikham a, an lo hrâwk hrep si!

Samsei lamin Fashion TV leh Korean Film an lo en ve laklawh tawh a, Paris leh Seoul khawpuia an thuamte an han entawn ve thuai a. Mahse le, fûr a lo ni a, lamlianah tui a tling piu piau a, an nalh tih ngaihtuah ve loin lirthei an lo khalh si a, an han chil per tlawrh mai a, ram danga han inpenparh daih chakna rilruin a fan rem rem awm e.

Internet lama inbiak tawn an han ching chhuak a, pulpit tlânga lo sel tawk an awm a, sual hnathawha lo puhsak ta chiam chiam tawk lah bo lo! Intihhlimna dang zawnga ‘Pool’ an chin chhuah lahin sêlna ankâ an do zawh loh vang nge, an income-in a pha lo; an til tiak leh deuh duak a.

"Lehkha i zir that peih loh chuan hlo i thlo mai ang," tia nu leh pate lo tihthaih fo, officer lian nih tum tura school leh vantlang inkhawm zawng zawnga fuihna thu lo dawng ve laklawh khan lehkha an han zirchhuak ta sap sap a, chuti ngawtin officer a lo nih theih reng reng loh! A officer hna bera kha a vang phauh mai a, post graduate vâl pawh an chuang ta phung mai a, thawh tur hre loin an tei suau suau a. An ram hruaitute chuan, "Hmun dangah hnâ thawk ngam rawh u," tiin an fuih a, "Ram danga kan thawh a ngaih lohna turin kan ramah hian hnathawh tur a siam theih ve lawm ni?" an han ti dek dek a, ram hruaitu fa nikhua vak lo neite leh thawh tur hre loa an tei rawlai hmutute’n, "Tunlai thalai mut nachang hre lo, thawh nachang hre lo," an ti zui hrep a, thla êng thlir voh voh chunga "van a duai mange" tih vung vung bak tihtur a tam tawh lo. Hlo han thlo dawn se, hlo thlo lo tura thluak suk hmin vek tawh an lo ni si a, hna hniam han thawk dawn se officer lian ni tura fuih an lo ni ve tawh si! Nu leh pate an lo pui vak bik lo nen; nupui neih a lo hun chho a, inneih hlimah nupuite’n thenawm khawvengah second hand an zuar kual a, nu leh pate pawisa dil duk duk a hrehawm si, pa viau a har tawh a ni.

Mizo thalaite hian an ramah ngei hian harsatna an tawk nasa mange! Khawvel tukverha dâk pha turin fuihna an dawng a, khawvel tukverhah an ram a dâk pha si lo. Khawvel pang lehlama thil thleng hre lo thei loin media-in a umzui zêl tawh si a, an ramah khawvel pang lehlama thil thleng ang a thleng tlem si! Media thlipui tleh an tlanchhiatsan thei lo va, an beng an hup thei hek lo va, mi rama thil ropui tak takte an hmuh laiin an ramah chuan ‘awm’ aiin ‘awm lo’ a tam zawk si!

Mi fate’n thian kawm na’na beer an thlit phuan suah suah leh an thlit sen phât phâtte media hmangin an hmu ve reng a, mahse anni chu an khawtlang nunin a permit ve lo. Park nuam taka nula tlangval lengho dial dial te, cinema chhuak thar ber ber an thlir dan te, Information Technology hmanga nunphung changkang tak an neih tawh te, khelmual tha pui puia an inel dan te, an khawpui thianghlim leh changkang tak te, hnathawh duh tan pawha ‘opportunity’ tamzia te, an changkanna leh hma an sawnna zawng zawngte an hmu ve vek a, mi tihdan tha an zir ve dawna a theih miau si loh chuan a chhelai an zir leh ngawt thin niin a lang. A thenin midumho hla chham leh an nundan nia an hriat uchuak deuhin an zir a, a thenin Paris khawpui vela model-ho khawsak dan nia an hriat, media-a an hmuh ang ang an zirchhawng a, a thenin khawchhak nula tlangval nun dan nia an hriat an zir mek bawk. An khawtlangin a zirtir tam ber chu Kohhrana inhman leh khawtlanga inhman a ni a, a tha viau; mahse, tam takin inkhawm reng an lo peih si lo va, chhun leh zan zawma khawtlanga inhman pawh an peih full thak lo va, engemaw tihtur an zawng lo thei lo va, an châk zawng tam tak chu an hmuh phak si loh avangin tam tak chu tihtur ber hre loin, ‘going where the wind blows’ an tih ang deuhin, thli chhemna lam lamah an phe kual ta vel mai mai a ni awm e.

Youth Icon a lo lar a, an ngaihsak hum hum a. Mizo Idol a lo chhuak a, an buaipui leh dual a. Europe khawmualpuiah leh khawvel pumah inkhel lar deuh a awm chuan buaipui leh dual a ni mai a, mobile phone, computer leh lirtheite pawh tangkai taka hmang ai mahin an nun za tihrehna atan an hmang nasa niin a lang a, hetiang khawpa Mizo thalai tam takin nun innghahna nghet (principle) an neih loh chhan leh kawngdik an zawh loh chhan hi vei tham a tling ta.

A duhthawh deuh keini ang phei chuan hman deuh atang khan mipat hmeichhiatna hman sual te, sex video te, sex photo-te a lo lar chhoh chungchangah hian rin dan kan lo nei a, ngaihdan hrang nei theuh kan nih avangin hnial duh tan pawh a hnial theih ang. Chu chu hei hi a ni. ‘Mizo thalaite tan an thisen lum tihrehna tur hi an ramah a vang em a, nula tlangval leng khawthawng duhte torchlight nena umzuite kan ching a, Valentino Rossi-te leh Michael Schumacher-te lo ngaisang ve tumhrang tawhte tan lah khawpui chhunga bike leh car-a lo intlansiak ve vak a rem si lo; picnic leh party lah a nawlpuiin kan hnualsuat ropui si a, zu leh beer-te lah dan ang chuan vana rah ang a ni si a, thiante nena cinema en dal dalna tur leh han len za hona tur park nuam ve deuh takte lah a awm bawk si lo; a rethei deuh phei chu han intihlim ve dawn se; picnic spot leh huan nuam deuh lah mi hausate ta a ni deuh thup vek si; restaurant-a chaw han eikhawm dal dal dawnin nu leh pate chawm tawk tawk thalaite tan chuan tlin reng chi a ni si lo; an tha za bawk si hi man nei lo hlimna lam hi an um ta ruak ruak mai a ni lo maw? A ruk a rala mipat hmeichhiatna hmang turin sum pai a ngai tam tawh der mai si lo va, porn movie leh Hollywood film-a an khawsak dan zawng zawng hre ve vek thalaite hi kan um chep phak tawh lohnaah an hmuh leh hriat ang hi an practice tan ta a ni mai lo maw?

Mipat hmeichhiatna hman sual hi Pathian duh loh zawng, natna tha lo tidarh theitu a ni tih kan hre theuh a, thalaite he lama an tlan chiam lohna tur hian Kohhrana inhmang tur leh khawtlang tana inhmang tura fuih zel hi a tawk em? Anmahni kohkhawma zilh hau leh hauh chiam ai chuan an thalai thisen lum tihreh vena tur zawnpui a sawt zawk ang em? A zilh hautu apiangin an that lai hun leh tunlai thalaite tehkhina dem chiam ringawt mai te, thalai zawng zawng nikhua tawh loa ngaih fai puk mai te, tunlai khawvel sual tawhzia sermon chiam chiamte hian thalaite hi kawng dikah a hruai meuh em ni le? An mamawh hriatpuia phuhruk dan zawnpui a sawt zawk lo maw? Thalai zawng zawngin khelmual tha an buaipui vek emaw ti tlat pawlte pawh an awm a, khawvel hmasawn dan mila hmasawnpuitu leh zirtirna tha ziktluak pe theitu ram hruaitu leh nu leh pa an mamawh ngawih ngawih a ni.

Thalaite fuihpawrh theih tawka ngai te, khelmual tha hmanga tihlungawi tawka ngai te, eng commission emaw hmanga hruai dik tumte pawh an awm a, mahse Mizo thalaite hian an hmuh leh an benga an hriat khawvel changkang chho zel mila an ram hi a kal ve an mamawh tawpkhawk tawh zawk a ni. Mizo thalaite’n ram hmasawn an mamawh e.

Tuhlakna ; e Mizoram

0 comments:

Post a Comment

Chhiartute Ngaihdan Huang