2 May 2009

Hruaitu Tha - I

By Dr CK. No Chhum

John C.Maxwell chuan, “Mi eng ang pawh hruaitu kan ni vek a, tumah hruaitu nihna dinhmun atanga tal chhuak thei kan awm lo”, a lo tih hi a dik hle a. Thenkhatin tlem deuh kan hruai a, then khatin tam deuh; chu chu kan danglamna a ni mai. Midang chu sawi loh, mahni fate ngei pawh hruai thei lo nu pawhin a pasal tal a thunun theih chuan, a pasal hruaitu a nih a vangin chu hmeichhia chu hruaitu a ni tihna a ni a; midang tumah va hruai thei lo mahse a thin chhiat luat vanga a nupui fanau ten an hlauh em em intekpa pawh hruaitu a ni tho bawk.


Hruaitu tha nih hi mi tam tak duhthusam a ni fo thin a, mahse hruaitu tha nih erawh a har hle thung. Nu le pa te pawn an fate chu hruaitu ni turin an duhsak a, thalai ten nih an tum ran a, mithiam ten an sawiin an ziak a, lem ziak thiam ten lema ziakin, mifingin nih an duh a; philosopher te suangtuahna luahtu leh Theologian te tum pawimawh ber pakhat pawh a ni. Mi tam takin hruaitu nih an duh a, mahse mi tlemte chauh hruaitu an ni thin. Hruaitu ni a, hnungzuitu nei lawi si lote chu khawlaileng ( walking ) mai an ni bawk. Chuvangin a awlsam zawnga sawi chuan hnungzuitu nei te hi hruaitu chu an ni mai. Kawng danga kan sawi chuan hnungzui nei thei tura midang va hip theitute ( Leadership is influence ) chu hruaitu an ni. Winston Churchill leh Mahatma Gandi te hruaitu nih dan chu ram leh hnam an tungding. Tam Watson Eduri Land leh Alfred P.Sloen te hruaitu nihna chu pawlho ( Organizations ) lian tak tak an din. Hitlar chu hruaitu pakhat a ni a, Jim Jones pawh kha hruaitu a ni ve. Lalpa Isua, Martinluther King Jr, Winston Churchill leh John F.Kennedy te pawh kha hruaitu an ni vek . Mahse heng mite hian an mi hruai dan leh an thiltihtheihna neih pawh a inang vek kher lo. Hnungzuitu an nei theuh a, hruaitu pawh an ni theuh a ni.

Hriattur thenkhat te :

  • Hruaitu hna ( leadership )leh ( management ) enkawltu hna hian danglamna an nei hret a. Tehkhinnan, I sakawr chu tui awmna hmunah I hruai thei a, mahse a duh lo chung chun tui intir theihna erawh I nei lo.

  • Mi hruai theihna nu pumchhung atang pianpuite pawh an awm ve hrim hrim. Mahse hruaitu tha ni tur erawh chuan zir an mamawh ve tho a, zirna lo chuan hma a sawn theih loh. Hruaitu nihna chu thil bo anga va hmuh leh va chhar mai chi a ni hek lo. Hruaitu tha nihna chu inzirtir theih thil a ni a, nu pumchhunga tang hruaitu nihna pianpuite pawn zirtirna an ngaihnep chuan hruaitu tha an ni thei thin lo. Tourist pakhat hian khaw pakhata putar pakhat hnenah, “In khua atang hian mi hmingthang leh mi ropui pakhat tal an chhuak ngai tawh em?, tia a zawhna chu putar chuan, “ kan khuaah chuan mi ropui leh mi hmingthang niloin naupang te te chauh an nute pumchhung atang an chhuak thin”, tiin a chhang a. Chumi awmzia chu “mi, tumah nu pumchhung atang hmingthang leh ropui sain an chhuak lo, mi engang pawhin kan kawng zawh engkimah zir leh theih tawpa tanlak kan mamawh theuh”, tihna a ni.

  • Hna chi khat va “thawh” leh “thawh zawh” chu hnathawktu ( labour ) hna a ni.

  • Midang hnenah “ hna thawhdan” va zirtir chu zirtirtu ( teacher ) hna a ni.

  • Anmahni hna theuh hlawhtling taka va thawh zawhtir chu Manager hna a ni.

  • An thawh thin pangai aia thaa thawhtir theih chu “hruaitu tha” hna a ni.

Hruaitu dinhmun mithiam ten an sawi thenkhat I thlirho dawn teh ang u:

  1. Jeffjernigan chuan tihian a sawi a, “ Hruaitu tha chu midang tana entawn tlakin a nung thin a. Hruaitu tha leh tha lo tehfung chu an thilthihtheihna leh taimakna lam ni lovin a nungchang atang teh tur a ni”.

  2. PKD LEE chuan, “ Hruaitu kan tih chu hnungzuitu nei nazawng khi an ni lo; hruaitu chu mi nundan siamthatsak a, mi khawsak dan pawh thlakthleng tir theite chu an ni zawk” a ti.

  3. Myron Rush chuan tihian a sawi ve a, “ Hruaitu tha chuan Isua zirtirna leh hruaidan zuiin mipui a hruai tur a ni. Hruaitu tha chu a thiltih ang kha a hnungzui ten an tihve theih nana zirtir theitu a ni a; hruaitu thain a tum ber chu ‘a hnungzuitute amah anga hruaitu tha dinhmuna ding thei tura kaihhruai leh kawng dap sak’ chu a ni”.

  4. Paul Beasly Murray chuan, “ Hruaitu tha chu midang tamtak nena hna thawk tlang theitu a ni tur a ni a, an zavaia hmasawnna tur leh mimal harsatna pawh hmuhthiampui theitu a ni”, a ti.

Kan ram leh hnam kohhran leh society inkaihhruaina hrang hrangin hmasawn leh hlawhtlin kan duh tak tak a nih chuan hruaitu dinhmun atang hruaitu tha dinhmun thleng rawka ke kan pen a pawimawh hle a ni.



0 comments:

Post a Comment

Chhiartute Ngaihdan Huang