14 March 2009

MS, I Dawn Chiang Lo Em Ni..?

2007 kum chawhma lam thleng kha chuan Bungtlangah a awm a, thing a phur, tui a chawi, thingtlang naupang a ni, chu’ng lai chuan. Chumi hnuah erawh amah ngaisangtute’n an phone, an pan, chanchinbu lamin an interview. “Kan nun dan hi a inthlak chiang lutuk, a mak lutuk a, ka sawi thiam lo!” a ti hial. Amah chu Youth Icon 2007 Malsawmtluangi a ni.
Tunah chuan a hmingchhe ta!
Mizoramah hian Mizo ngeiin mipat hmeichhiatna an hmang lai video leh saruak thlalak hmuh tur a tam ta hle a, nula leh tlangval mai ni lovin, nupain mipat hmeichhiatna an hmang lai video pawh hmuh tur a awm. Thlalak a awlsam ta hle a, a thehdarh lam pawh a awlsam ngang mai. halai kei ka ni inti chin chuan hetiang thehdarhna theihna hmanrua leh a kawl that theihna hmanrua hi an nei vek emaw tih tur a ni. Chutiang khawvelah chuan tun hnaiah video thar a lo chhuak a, a hmeichhia chu Malsawmtluangi Fanai nia sawi a ni.
He video a tlangthan tirh lamah hian MS-i chu Kawrtethawveng lamah a zin a, Aizawla a let veleh a album thar tur buaipui chhunzawm a tum. Chu album-a mi tur chu hla a ngah tawh a, music track te pawh a then chu a siam tawh nghe nghe.
Mahse, Aizawl a rawn thlen chuan album buaipui thei ziazang a ni ta lo.
An khua - Bungtlangah a haw a, biakpawh hleih theih a ni ta lo. Hrehawm ti takin a tawmim ta a ni.
"A hrehawm lutuk, hetiang thil hi ka chungah a thleng ang tih ka ngaihtuah ngai lo. A rapthlak tawp," MS-i chuan a ti.
Zozam Weekly chuan Bungtlanga tawmbo mek MS-i hi a bepawp a, ani chuan hrehawm a tihzia leh a zahzia bak sawi theih a nei lo.
"A hrehawm han tihah pawh a hrehawm ngawih ngawih a ni mai. A rapthlak tawp ni berin ka hria. A zahthlak a, mahni chauha awm pawhin a zahthlak tho," MS-i chuan a ti.
"Tih ngaihna ka hre lo a, awm dan tur pawh ka hre lo. Tihian ka awm tawp a, ka tuar tawp a ni mai. Tawrh chawrh chawrh bak tih theih a awm lo," a ti bawk.
"Ka awm tawp a, ka tawngtai thin. Tin, ka mangan avangin Bible te ka chhiar a, Pathian tanpuina ka ngen thin. Tawngtai bak hi tih theih a awm lo," tiin a sawi zawm a ni.
"Min lo ngaina der ve tute ka zah a, ka zai ngaithla thinte pawh ka zah. Tin, Youth Icon-a min thlangtu LPS chhungkua pawh ka zah," tia sawiin, "Mi hian heti khawp hian min lo ngaihven ang tih ka lo hre pha lo. Zaimi kan ni a, zaina tur a awm changin kan zai ve a ni mai a, hmeichhe pakhat ve maiah ka inngai a. Hetiang hian mi hian min ngaihven tih hi ka lo hre lo a, awm dan tur pawh ka lo hre lo a ni," a ti bawk.
A dinhmun sawiin, "Naupang te ka ni a, ka la puitling lo em em a, finna lamah pawh engmah ka ni lo tih ka hria. Thu awih takin ka awm ve tawp mai thin a ni. Ka nihna leh ka dinhmun hi mi hian min hriatpui ve se ka duh khawp mai. Engmah ka ni lo tih hi mi hian hria se ka duh," a ti.
"Ka dinhmun hi a hrehawm em em a, ka tuar hi a na tawp. Hetiang dinhmunah hi chuan tumah ding turin ka duh lo. Mi pawh hian hetiang dinhmunah hian tumah dintir lo se ka duh," a ti a, a zai zel dawn nge a chawlhsan dawn tih pawh a sawi theih loh thu a sawi hial.
"Ka hma lam hun engmah ka sawi thei lo a, ka zai zel dawn nge zai zel dawn pawh ka hre lo. Chutiang ngaihtuah thei ka ni rih lo. Tunah chuan hetia awm tawp hi ka tih theih awm chhun a ni a, ka zai zel dawn nge zai tawh dawn lo tih chu nakinah ka ngaihtuah ang, ka ring, hunin a la hril ang chu..." tiin hemi chungchang hi a sawi a ni.
MS-i chuan a chungah mi an tha hle niin a sawi a, miin an hmuhsit a rin laia hetianga mi an tha hi a lawmzia pawh a sawi.
"hiante'n min rawn bia a, min khawngaihzia te min rawn hrilh a, tin, min lo ngaina vetute'n min khawngaih thu leh min tawngtaipui thu te min hrilh bawk a, an chungah ka lawm em em a ni. Kan khuaah pawh ka chungah mi an tha em em a, min khawngaih vek mai niin ka hria. An rawn leng a, min khawngaih thu an rawn sawi a, a then chu kan inah te an rawn tawngtai a, Kohhran Upa te pawh an rawn tawngtai a, ka lawm lutuk. Hetiang hi ka lo beisei lo a. Chutih rual chuan, mite'n heti taka min lo ngainat laia lawmthu pawh sawi thei lo leh awmbo daih ngai khawpa ka awm hi pawi ka ti a, min lo ngaina vetute ka zah khawp mai," a ti.
MS-i hian zu a in ngai lo niin a sawi a, ruihtheihthil a ti ngai lo hrim hrim niin a sawi bawk. Ngaihzawng pawh a ngaihsak ngai lo nia sawiin, lerh a inti ngai lo tih thlengin a sawi.
Mi thenkhatin a chungchang mak deuh deuhin a sawi nia sawiin, hrechiang lovin an rinthu an sawi mai mai nia a hriat thu a sawi bawk.
A bak engmah a sawi duh lo a, "Mimal thil a awm a, ka sawn dawn lo. Mi tinin thuruk kan nei a... kei pawh min hrethiam rawh u," a ti.
"Tun ang dinhmunah hi chuan tawng sual te a hlauhawm a, engmah ka sawi ngam lo. Tin, sawi tur pawh ka hre lo. Rilru fima inngaihtuah phawt a ngai a, chutiang tur chuan min duhsaktute pawhin thurawn min pe a, chuvangin, hetia awm tawp rih hi ka duh," a ti bawk.
Youth Icon host Mali chuan MS-i hmingchhiat vanga hrehawm an tih thu sawiin, "Hetiang hi Icon-ho chunga a thlen ka ring phal lo a, MS-i chungah phei chuan a thleng ang tih ka ring lo lehzual. Amah hi rilru tha tawp, thu awih em em mai a ni a, a thuawih lutuk hi a buaithlak zawk. Khawngaih thlak khawpa thuawih thei a ni. Kan naute hi thuawih turin kan fuih thin a, MS-i erawh chu thuawih lo deuh tura tih a ngai. Chutiang mi chu a ni a, a hmingchhiatnaah pawh hian a khawngaihthlak khawp mai. A chunga zahngai turin mipui ka ngensak a, hei aia hrehawm lehzuala a awm loh nana pui turin ka ngensak a ni," tiin MS-i chungchang hi Zozam Weekly a hrilh.He video chungchang hi an chhui mek a, thil awmzia an ngaihtuah mek tih sawiin Mali chuan, tunah chuan engmah sawi theih an nei rih lo tih a sawi a ni. MS-i pawh engmah sawi rih lo tura an tih thu a sawi bawk.
"Icon thlannaa telte chu an hmingchhia a nih chuan an nihna hlihsak tur an ni a, chutiang tur chuan an intiam bawk. Chuti lamah chuan hma kan la dawn a, mahse, tunah thutlukna engmah kan nei lo. Thil awmzia hre phawt lo chuan thutlukna siam ngawt chi a ni lo a, thil awmzia kan ngaihtuah mek a ni," Mali chuan a ti.


Thulakna : Zozam Weekly News

0 comments:

Post a Comment

Chhiartute Ngaihdan Huang