14 March 2009

Kalchar leh Tunlai

By Tv. Edenthara, Malaysia
Hnam tin hian kalchar, pi pute thu rochhiah kan nei theuh a. Chung zingah chuan Zofate hi hnam tenau mah ni ila, kan chhungmu erawh a ruh hle. Hnam dangte neih ve loh tlawmngaihna kan nei hi kan hnam ze parmawina ni berin a lang.
Kalchhar sawi dawn chuan Zawlbuk hi sawi tel loh a theih lova, Zawlbuk hi Zofate hnukpui ber leh zirna run lo intanna bulpui ber a nih avangin zo nunah a pawimawh ber awm e. Tunlaiah chuan zawlbuk awmzia pawh kan hre fumfe tawh lova, pi pute hun lai chuan an university tha ber a ni tawp mai. Khawchhung thalai zawng zawng leng turin a lai takah hall an sa thin. Pu Darchhawna chuan Zawlbuk kha " inzirna hmun,khawtlang nun vawngtu,rikrum thila thalaite chhuah khawmna hmun remchang,tlawmngaihna chhawmnun zelna, pi pute hun laia kalchar center leh hnam ro inrelna hlanchhawnna hmun" tiin a lo pharhchhuak.
Zawlbuk atang khan mipa tawh phawt chuan nun an lo zir a. Dan leh dun khauh taka hman a nih avangin Zo nun khawvel chu a lo mawi ngei mai. Mahse kan Misawnarite keh ringtu hmasaten Mizo insuihkhawmna hmun zawlbuk hi thiah a nih loh chuan Kristianna hian hma a la thei dawn lo nia an hriat tlat avangin Zonun khawvel ( the globle of Mizo life ) leh zofate nun phungmawi ( the beauty of Mizo culture ) chu an lo tihchimitsakna khan vawin thleng hian Zofate nun a la nghawng tiin kan mithiamten an sawi..
A ni tak a, kan Misawnarite khan zawlbuk leh Kristianna hi inep tlatin an hmu a. Kristian hmasa apiangten zawlbuk bansanin sap nun leh Western Theology an zui zela, khua a lo rei a zofate kalchar chuan endawng a lo hlawh ta niin a lang. He lai thu hi kan thlir thiam a ngai, Pu Darchhawna sawi danin sapho khan thil tum pahnih an nei. Chungte chu: (1) an kalchara min hruai luh an tum,(2) chuvangin sap kalchar atangin Kristianna a lo luta,dingdihlipa man phak chauhin Chanchin Tha min pe" a lo ti a. Tunlai kan Kristian nun kan thlirin sap takin kan inti Kristiana pi pute nun zia leh kalchar zahpuiin sapho inchei dan leh suk thlek dan zirin kan lawihuai hawi velh vulh hlawm a nih hi. Pu Lalmanliana chuan kan Kristian dan hi boruaka lengvel lek fangin a sawi. Chumai a ni lo, Prof.Siamkima phei chuan a letlinga kal, mahni inhre chiang lovin hnam dang nun rilru leh tih dante khawr taka zui hmang min lo ti bawk. Choak Arawn nih ve tuma Arawn hmul inbel ve chhen kan va iang awm ve le.Pathian khawngaihna a zarah Zofate hian hmun hrang hrang leh ram hrang hrangah zung kan kaih ve ta nuk mai a. Chutah hmasawna lamlian zawhin khawthlir tih changkan tum luatah hian kalchar hlutna leh pi pute thurochhiah hnualsuat zawngin kan thang chho ang tih erawh hlauhthawnawm tak a ni. Khawvel hmasawnnain a ken hmanruate hi kan hman thian a ngaia, chuti lo chuan hnam nun a buai duh chawk. Inchei dan leh eibar zawnnaah, hla leh rimawwiah, abik takin Kristian nunah leh tawng hmanah nise kan nihna hi kan hriat chian a pawimawh tak zet. Khawvel hmasawnnain a ken hmanruate hi kan hnam nun chawmtuah hmang thiam i la a tha apiang inbelin mahni hnam nun erawh a sang bera dah khiau tur a ni. Abikin, ram hlaa chengten mahni tawng leh kalchar hi kan vawn nun thiam a pawimawh. Mahni hnam nungchang zahpuiin hnam dang tawnah parvulin kan kalchar hi a nung chunga phumtu kan ni ang tih mawlh hi a hlauhawm a ni.A tawp ber a tan kalchar chu hnam thil nunphung leh zia, hnam hrang zel kara ze nghet tih a ni a. Mahse,tunlai hmasawnna thang zel karah kalchar intih humhalh luat avanga tih dan hlui (thing) lutuk tak lo lekkawh vak pawh hi a tha ber lem lo. Khawvel hmasawn ang zela kalchar pawh hi tih hmasawn tur a ni. Tehkhin nan, tlawmngai zualko tlan rau rauah ke leh thirsakawra tlan ai chuan bike a tlan a nuamin a rang fe. Chutiangin thu leh hla lamah pawh nise, hmasawn zia ang zela, kan solfa key pawh tihdanglam mai tur a ni. Chuti lo chuan hmasawnna hian kan hnam nunah awmzia a nei pha lo ang. Tin, kan misawnnarite khan Kristianna leh kalchar (zawlbuk) kha inep tlatin hmu mahse, Kristianna hian kan hnam nun kalchar hi a uap lum zawk tur a ni. Hun kal zel turah pawh Kristianna leh kan hnam nun hi kan hringnunah par kawp tlat rawh se!

0 comments:

Post a Comment

Chhiartute Ngaihdan Huang